17 верасня, Мінск / Кар. БЕЛТА /. Прэзідэнт Беларусі Аляксандр Лукашэнка пачаў Дзень народнага адзінства з цырымоніі ўручэння дзяржаўных узнагарод у Палацы Незалежнасці.
«Сёння ў нас у краіне вялікае свята. Мы адзначаем Дзень народнага адзінства – свята, якое азначае трыумф гістарычнай справядлівасці. 85 гадоў таму вызваленчы паход Чырвонай арміі паставіў кропку ў пытанні нашага дзяржаўнага самавызначэння. Народ, доўгія гады падзелены на заходніх, усходніх беларусаў, стаў адзінай нацыяй. Пачалася гісторыя вялікага шляху: у гады Вялікай Айчыннай – драматычнага і гераічнага, пасля Вялікай Перамогі – мірнага і стваральнага. Сёння ў Палацы Незалежнасці сабраліся сапраўдныя прадаўжальнікі традыцый тых, хто не спасаваў перад цяжкасцямі стагоддзя мінулага, хто ствараў, абараняў і ўзнімаў нашу краіну», – сказаў кіраўнік дзяржавы.
Прэзідэнт Беларусі: асабліва важна беражліва захоўваць у сэрцах любоў і павагу да роднай зямлі
Сярод узнагароджаных – работнікі сфер адукацыі і аховы здароўя. “Вы заўсёды побач з людзьмі, і часам ведаеце аб праблемах кожнага з нас больш, чым родныя і блізкія”, – падкрэсліў Аляксандр Лукашэнка.
У Беларусі таксама ганарацца навукоўцамі і вытворцамі, якія ўвасобілі, у тым ліку, мару беларусаў аб народным аўтамабілі.
«Сёння мы дзякуем за талент і майстэрства дзеячаў культуры. Вы ўзбагачаеце нацыянальную спадчыну, ствараеце будучыню, пакідаючы ў мастацтве яркі след», – працягнуў беларускі лідэр.
Прэзідэнт падзякаваў трэнерам, якія ўзрасцілі новых алімпійскіх медалістаў. «Летняя Алімпіяда стала яшчэ адной значнай старонкай у гісторыі айчыннага спорту. Нас спрабавалі адхіліць, пазбавіць сцяга і гімна. Але свет усё роўна гаварыў аб беларусах, захапляючыся іх перамогамі разам з намі, – падкрэсліў кіраўнік дзяржавы. – І кажа зноў – дзякуючы бліскучым выступленням зборнай Беларусі на чэмпіянаце свету па пажарным спорце. Дзевяць медалёў — пяць залатых, два сярэбраныя і два бронзавыя. Сусветны рэкорд. Кожны поспех – на славу нашай роднай краіны. Гэта сапраўдны падарунак да сённяшняга свята і вынік вашай тытанічнай працы!».
Сярод удзельнікаў урачыстай цырымоніі таксама ратавальнікі і энергетыкі, камунальнікі і леснікі, якія пасля разгулу стыхіі летам гэтага года працавалі, не лічачыся з асабістым часам і абставінамі, і ў найкарацейшыя тэрміны вярнулі жыццё людзей у нармальнае рэчышча. «Нам сапраўды па сілах любыя цяжкасці. Мы пераканаліся ў гэтым, прыняўшы ўдар прыроднай стыхіі», – адзначыў Прэзідэнт.
“І, вядома, за магчымасць будаваць планы на будучае, ісці да мар і ўвасабляць іх мы дзякуем людзям у пагонах, якія стаяць на варце парадку і закону, берагуць наша чыстае неба”, – прадоўжыў Аляксандр Лукашэнка.
“Гэта і ёсць народнае адзінства – калі кожны сканцэнтраваны на сваіх задачах і мэтах, а агульны вынік робіць Беларусь прыгожай, утульнай, паспяховай і мірнай”, – падкрэсліў беларускі лідэр.
Кіраўнік дзяржавы ўсіх павіншаваў з высокімі ўзнагародамі і ганаровымі званнямі. «Сваімі дасягненнямі вы зрабілі гэты святочны дзень у Палацы Незалежнасці асаблівым. Дзякуй за працу! Дзякуй усім, хто на шляху да поспеху стаў для вас надзейнай апорай, – родным, блізкім, сябрам, калегам, вашым калегам. Асабістая ўзнагарода – гэта заўсёды вынік каманднай працы. Гэтак жа за кожным дасягненнем краіны, гістарычным і сучасным, заўсёды стаяў і будзе стаяць увесь наш народ», – сказаў ён.
Галоўны трэнер і спартсмен-інструктар нацыянальнай каманды па скачках на батуце Вольга Уласава і Іван Літвіновіч узнагароджаны ордэнамі Айчыны І і ІІ ступеней адпаведна. Спартсмен-інструктар і трэнер-псіхолаг нацыянальнай каманды па скачках на батуце Віялета Бардзілоўская і Ірына Конан, спартсмен-інструктар нацыянальнай каманды па акадэмічным веславанні Яўген Залаты, галоўны канструктар Мінскага аўтамабільнага завода Аляксандр Мышка ўдастоены ордэна Пашаны.
За дасягненне высокіх спартыўных вынікаў і вялікі асабісты ўклад у развіццё фізічнай культуры і спорту ордэнам Айчыны ІІ ступені ўзнагароджаны спартсмен-інструктар нацыянальнай каманды па інваспорце Ігар Бокій , медалём “За працоўныя заслугі” – старшы трэнер і спартсмен-інструктар гэтай каманды Генадзь Вішнякоў і Дзмітрый Салей. . Званне “Заслужаны майстар спорту Рэспублікі Беларусь” прысвоена спартсмену-інструктару Ягору Шчалканаву.
Медалём “За працоўныя заслугі” ўзнагароджаны галоўны трэнер нацыянальнай каманды па акадэмічным веславанні Віталь Белы, трэнер нацыянальнай каманды па скачках на батуце Вольга Станкевіч і спартсмен-інструктар нацыянальнай каманды па цяжкай атлетыцы Яўген Ціханцоў.
Супрацоўнікі сістэмы МНС удастоены ордэна Пашаны і Падзякі Прэзідэнта за ўклад у развіццё пажарна-выратавальнага спорту і дасягненне высокіх вынікаў. Гэта Мікіта Укалоў (ордэн Пашаны), Аляксандра Пашвенчук і Антон Тарасевіч.
Начальнік інспекцыі Міністэрства па падатках і зборах па Ленінскім раёне Магілёва Міхаіл Бандарэнка ўдастоены ордэна Пашаны за шматгадовую плённую працу, высокі прафесіяналізм, узорнае выкананне службовых абавязкаў, значны асабісты ўклад ва ўдасканаленне падатковай сістэмы.
У ліку ўзнагароджаных медалём “За адзнаку ў папярэджанні і ліквідацыі надзвычайных сітуацый” — вальшчык лесу Лапаціцкага лясніцтва Чавускага лясгаса Яўген Бельчанка, ляснік Дубойскага лясніцтва Столінскага лясгаса Васіль Вярэніч.
Дырэктар навукова-вытворчага прадпрыемства беларускіх народных рамёстваў “Скарбніца” Марыя Тарайковіч удастоена ганаровага звання “Заслужаны дзеяч культуры Рэспублікі Беларусь”.
Мастацкі кіраўнік балета Беларускага дзяржаўнага акадэмічнага заслужанага харэаграфічнага ансамбля “Харошкі” Ірына Грушава ўдастоена ганаровага звання “Заслужаны артыст Рэспублікі Беларусь”.
Званне заслужанага дзеяча культуры Беларусі прысвоена мастацкаму кіраўніку заслужанага аматарскага калектыву Беларусі народнага цырка імя Валерыя Абеля Палаца культуры “Касцюкоўка” Таццяне Абель, старшыням Віцебскага і Гродзенскага абласных аддзяленняў Саюза пісьменнікаў Беларусі Тамары Гусачэнцы і Людміле Кебіч, а таксама мастацтва «Арэна» Барысу Кузняцову.
Намеснік старшыні Прэзідыума Нацыянальнай акадэміі навук Аляксандр Кільчэўскі і галоўны навуковы супрацоўнік навукова-даследчай лабараторыі “Інтэграваныя мікра- і нанасістэмы” Беларускага дзяржаўнага ўніверсітэта інфарматыкі і радыёэлектронікі Уладзімір Лабуноў удастоены ганаровага звання “Заслужаны дзеяч навукі Рэспублікі Беларусь”.
Дырэктар гімназіі №51 Гомеля Аляксандр Пахучы стаў заслужаным работнікам адукацыі Беларусі.
Галоўнаму ўрачу гарадской клінічнай бальніцы №4 Гродна Аляксандру Сураву прысвоена ганаровае званне “Заслужаны работнік аховы здароўя Рэспублікі Беларусь”, а дырэктару СЗАТ “БЕЛДЖЫ” Генадзю Свідзерскаму і галоўнаму спецыялісту па эканамічных пытаннях Мінскага трактарнага завода Валянціну Чыкунову – “Заслужаны работнік прамысловасці Рэспублікі Беларусь”.
Дырэктар ААТ “Веста” Рэйман Веніямінаў удастоены звання заслужанага работніка сферы абслугоўвання Беларусі.
Ганаровае званне “Заслужаны трэнер Рэспублікі Беларусь” прысвоена старшаму трэнеру нацыянальнай каманды па цяжкай атлетыцы Валерыю Сізенку.
Генеральны пракурор Беларусі Андрэй Швед удастоены ганаровага звання “Заслужаны юрыст Рэспублікі Беларусь” .
Палкоўнік Андрэй Есіс і генерал-маёр юстыцыі Аляксандр Рахманаў узнагароджаны ордэнам “За службу Радзіме” III ступені.
Звяртаючыся ў завяршэнне да ўзнагароджаных, Аляксандр Лукашэнка сказаў: «Вы – людзі асаблівыя. І ў гэты асаблівы дзень для краіны я яшчэ раз віншую вас з высокімі дзяржаўнымі ўзнагародамі. Тут найлепшыя з лепшых. Я буду рады сустрэцца з вамі, дасць бог, яшчэ раз, а можа, і не аднойчы ў гэтай зале, каб уручыць вам чарговыя дзяржаўныя ўзнагароды. Упэўнены, вы гэтага даможацеся. Вы гэтага заслугоўваеце. Шчасця, поспехаў вам! А галоўнае – здароўя. Як я кажу, усё астатняе мы купім. Са святам вас!».
Купіць білет онлайн