Поўны відэарэпартаж даступны па спасылцы – Вынікі тыдня Прэзідэнта .
Цэнтральнай падзеяй тыдня стаў візіт Прэзідэнта Беларусі ў Туркменістан для ўдзелу ў пасяджэнні Савета кіраўнікоў дзяржаў СНД. Садружнасць сёлета адзначае 35-годдзе, што стала падставай для падвядзення некаторых вынікаў, вызначэння задач па пашырэнні супрацоўніцтва, супрацьдзеянні сучасным выклікам і пагрозам, адаптацыі да новых рэалій. Аляксандр Лукашэнка ў ліку розных актуальных тэм асабліва вылучыў неабходнасць узаемных крокаў да больш цеснага адзінства краін СНД і перш за ўсё – у эканоміцы.
Сумесныя праекты – але ўжо іншага ўзроўню – абмяркоўваліся на сустрэчы кіраўніка дзяржавы са старшынёй расійскага ПАТ «Банк ПСБ» Пятром Фрадковым. Стала ўжо традыцыйным, што Аляксандр Лукашэнка рэгулярна праводзіць перагаворы з кіраўнікамі расійскіх рэгіёнаў. А апошнім часам прайшлі сустрэчы беларускага лідара з прадстаўнікамі буйнога бізнесу, інвестыцыйных структур Расіі. Магчыма, гэта тлумачыцца наяўнасцю ў двухбаковым парадку дня маштабных інфраструктурных праектаў. Напрыклад, па будаўніцтве высакахуткаснай магістралі ад Масквы да Мінска. Гэта вельмі запатрабавана, бо, як заўважыў Прэзідэнт, грамадзяне Беларусі сталі так часта наведваць Расію, што гэта ўжо можна назваць “пілігрымкай беларусаў у Маскву” . Аляксандр Лукашэнка прапанаваў кіраўніку банка развіваць супрацоўніцтва для таго, каб народы дзвюх краін былі заўсёды разам і ніколі не ўзнікала нават размоваў аб магчымасці іх разарваць. Гэтая прапанова была цалкам падтрымана Пятром Фрадковым.
Віншавальнае пасланне з нагоды дня нараджэння было накіравана ад кіраўніка беларускай дзяржавы Прэзідэнту Таджыкістана Эмамалі Рахмону .
На тыдні ў Беларусі адбыліся некалькі значных міжнародных мерапрыемстваў, удзельнікам якіх накіроўвалася прывітанне ад беларускага лідэра. Нязменнасць пазіцыі Беларусі ў адносінах да барацьбы з тэрарызмам падкрэслівалася ў звароце кіраўніка дзяржавы да ўдзельнікаў Контртэрарыстычнага форуму ў Мінску. Асаблівае значэнне супрацоўніцтва ў сферы правасуддзя па збліжэнні нацыянальных прававых сістэм, абмене вопытам і ўкараненні перадавых практык адзначана ў пасланні Аляксандра Лукашэнкі ўдзельнікам другога пасяджэння Савета старшынь вярхоўных (вышэйшых) судоў дзяржаў – удзельніц СНД, якое прайшло ў беларускай сталіцы. “Пабрацімскі рух з’яўляецца адным з ключавых элементаў беларуска-расійскай народнай дыпламатыі, які пашырае сферы супрацоўніцтва, надае магутны імпульс інтэграцыйным працэсам”, – гаворыцца ў прывітанні Прэзідэнта ўдзельнікам XIV Форуму гарадоў-пабрацімаў Беларусі і Расіі , месцам правядзення якога стаў Бабруйск.
Словы асаблівай удзячнасці кіраўнік дзяржавы адрасаваў аграрыям Магілёўскай і Гомельскай абласцей у віншаваннях з нагоды фестывалю-кірмашу “Дажынкі” ў Шклове і Калінкавічах.
Прэзідэнт павіншаваў з прафесійным святам – Днём работнікаў культуры – таленавітых і неабыякавых людзей, якія прысвяцілі сябе служэнню мастацтву, адзначыўшы іх асаблівыя заслугі ў прымнажэнні духоўнай спадчыны. Для народнага артыста Беларусі Яўгена Гладкова свята атрымалася двайное – у гэты дзень у яго юбілей, з якім яго павіншаваў Прэзідэнт.
Важкі ўклад у эканамічную і экалагічную бяспеку ААТ “Белрэсурсы” – кіруючая кампанія холдынгу “Белрэсурсы” адзначаны кіраўніком дзяржавы ў віншаванні калектыву і работнікам гэтай структуры з нагоды 30-годдзя з дня яе стварэння.
Віншаванні ад кіраўніка дзяржавы накіраваны Прэзідэнту Уганды з Днём Незалежнасці, а таксама выбранаму Прэзідэнту Рэспублікі Сербскай Босніі і Герцагавіны .
Акрамя таго, Прэзідэнт зрабіў кадравыя змены ў судовай сістэме , прыняў рашэнне аб узнагароджанні ордэнамі і медалямі 11 прадстаўнікоў сілавых структур і ваенна-прамысловага комплексу, а таксама ўдастоіў медалі Францыска Скарыны старшыні Камісіі Парламенцкага сходу Саюза Беларусі і Расіі па культуры Мікалая Бурляева .
НАВУКОВЫ АРСЕНАЛ. Якімі перадавымі распрацоўкамі для абароны можа пахваліцца Беларусь і што патрабуе ад вучоных Прэзідэнт
Кіраўнік дзяржавы ў час рабочай паездкі ў Мінскую вобласць 6 кастрычніка наведаў выпрабавальны палігон ДНУ “Інстытут парашковай металургіі імя акадэміка А.У.Рамана”. На гэтай пляцоўцы Прэзідэнту прадставілі самы шырокі спектр распрацовак айчынных вучоных, якія даюць магчымасць умацоўваць бяспеку дзяржавы ў шырокім сэнсе гэтага слова. Гэта, напрыклад, беспілотнікі, высокаэнергетычныя выбуховыя рэчывы, браніраваныя аўтамабілі, бронекамізэлькі, спецыяльны рыштунак.
У такіх адчувальных для краіны кірунках безумоўна важна забяспечыць тэхналагічны суверэнітэт, а папросту кажучы – па максімуме вырабляць самае неабходнае самастойна. І пажадана – зазіраючы за гарызонт, апярэджваючы іншых у плане тэхналогій. З такой задачай пад сілу справіцца вучоным, працуючы ў цесным кантакце з ваеннымі – каб запускаць у вытворчасць самыя запатрабаваныя, эфектыўныя вырабы. На гэта і арыентаваў Прэзідэнт, знаёмячыся з перадавымі ўзорамі. Пры гэтым тэрміны ставіў вельмі сціснутыя.
«Патрэбен вынік. Гэта не павінна быць чарговай казкай, што мы заўтра нешта зробім, – запатрабаваў кіраўнік дзяржавы. – Мужыкі, я хачу, каб вы разумелі: вось гэтыя размовы агульныя нікому не патрэбныя. Ваенным мы задачы ставім сур’ёзныя, надзвычайныя. Трэба імгненна рашыць тыя задачы, якія трэба рашыць. Нам не патрэбны навукоўцы, якія ходзяць і казкі расказваюць».
Аляксандра Лукашэнку запэўнілі, што многія распрацоўкі вучоных у сферы нацыянальнай бяспекі ўжо ўкаранёны на практыцы, праведзены неабходныя выпрабаванні, па шэрагу напрамкаў пачата серыйная вытворчасць.
Прэзідэнт падкрэсліў, што калі па таму ці іншаму запатрабаванаму напрамку будзе вынік, то і ён асабіста, і дзяржава ў цэлым заўсёды акажуць неабходную падтрымку: “Зрабі і прыходзь, як я часта гавару, прасі што захочаш”.
У ваеннай сферы адна з актуальных задач, як сказаў Аляксандр Лукашэнка, – “абнуліць беспілотнікі”. Гэта значыць, распрацаваць такія сродкі, якія дазволяць гарантавана і эфектыўна з імі змагацца. Тым больш, у Беларусі ёсць навуковыя школы, якія працуюць у гэтай сферы. «Калі вы разумныя, як мы выхваляемся, баяздольныя, прасунутыя, з характарам, ну так зрабіце. Абнуліце гэтыя беспілотнікі. Не трэба гонку ўладкоўваць, хто лепш беспілотнік зробіць. Галоўнае – навучыцца змагацца з беспілотнікамі», – заявіў Прэзідэнт.
Кіраўніку дзяржавы прадэманстравалі навуковыя распрацоўкі грамадзянскага і абароннага прызначэння, уключаючы рэактыўныя снарады, боепрыпасы да БПЛА і ўзрывальнікі да іх, сумесевае ракетнае цвёрдае паліва. Аляксандр Лукашэнка азнаёміўся з тэхналогіяй амуніцыі рэактыўных снарадаў сумесевым ракетным палівам і паназіраў за выпрабаваннем ракетнай рухальнай устаноўкі.
Аляксандр Лукашэнка азнаёміўся са сродкамі выяўлення, суправаджэння і знішчэння БПЛА, распрацоўкамі ЗАТ “Авіяцыйныя тэхналогіі і комплексы” і УП “Навукова-тэхнічны цэнтр “ЛЭМТ”. Асабліва кіраўніка дзяржавы зацікавіў двухмесны аўтатлуш “Філін”. Апарат надзейны, здольны забяспечыць бяспечную пасадку нават пры адмове рухавіка. Можа выкарыстоўвацца ў разведцы, назіранні, для мэт транспарціроўкі і выканання спецыяльных задач. Але гэта далёка не поўны спектр магчымасцей. Айчынныя спецыялісты змаглі прыстасаваць гэты аўтатлушч і пад задачы для сельскай гаспадаркі пры апрацоўцы палёў. Але перш чым весці размову аб маштабаванні вытворчасці, трэба ўсё дакладна пралічыць, арыентаваў Аляксандр Лукашэнка.
У якасці падарунка кіраўніку дзяржавы паднеслі поўнасцю айчынны цеплавізійны прыцэл, які выкарыстоўваецца для аснашчэння стралковай зброі.
САМІТ У ГОД 35-ГОДДЗЯ СНД. Ключавыя рашэнні лідэраў і заявы Лукашэнкі аб тым, чаго не хапае Садружнасці Аляксандр Лукашэнка 8-9 кастрычніка знаходзіўся з рабочым візітам у Туркменістане, дзе прыняў удзел у саміце Садружнасці Незалежных Дзяржаў, якому сёлета спаўняецца 35 гадоў. Мерапрыемства высокага ўзроўню праходзіла ў нацыянальнай турыстычнай зоне Туркменістана “Аваза”.
Напярэдадні саміту лідары краін і іншыя высокія госці былі запрошаны на гала-канцэрт майстроў культуры і мастацтваў з краін Садружнасці. Была арганізавана выстава дзяржаў — удзельніц СНД, дзе яны прадставілі інфармацыю аб прадукцыі, дасягненнях галін эканомікі, помніках духоўнай і матэрыяльнай культуры.
Прэзідэнт Беларусі перад пачаткам саміту правёў сустрэчу з Прэзідэнтам Туркменістана Сердарам Бердымухамедавым. Апошнія гады гандлёва-эканамічнае супрацоўніцтва дзвюх краін дынамічна развіваецца. У 2025 годзе тавараабарот склаў $268,5 млн, павялічыўшыся больш як у два разы ў параўнанні з 2024 годам. Сальда для Беларусі дадатнае ў памеры амаль $236 млн. Аб’ём гандлю паслугамі ў мінулым годзе перасягнуў $50 млн, дадаўшы на чвэрць да ўзроўню папярэдняга года. Высокая дынаміка росту ў супрацоўніцтве Беларусі і Туркменістана захоўваецца і сёлета.
Пасяджэнне Савета кіраўнікоў дзяржаў СНД традыцыйна праходзіла спачатку ў вузкім складзе, а потым прадоўжылася ў пашыраным, дзе акрамя лідэраў краін СНД па запрашэнні туркменскага боку прысутнічаў таксама Прэзідэнт Ірана Масуд Пезешкіан.
У парадак дня саміту СНД уваходзіла больш за паўтара дзясятка пытанняў. Яны ў тым ліку датычыліся сацыяльнага развіцця і якасці жыцця, транспартнай звязанасці СНД, сумеснай работы ў інфармацыйнай прасторы, супрацоўніцтва ў праваахоўнай сферы, захавання гістарычнай памяці.
“Добра, што мы сустракаемся, пагаварылі, зрабілі заяву. Але давайце зробім і іншыя крокі ў вобласці больш цеснага адзінства. А адзінства нам забяспечыць найперш эканоміка. Гэта і дабрабыт, гэта і моц нашых дзяржаў. Тады менш будзе размоваў аб незалежнасці, захаванні межаў і іншым. Трэба ўзмацняць эканоміку. І ў гэтым плане нам трэба сур’ёзна папрацаваць», – заявіў беларускі лідэр.
Аляксандр Лукашэнка адзначыў, што цяпер у Садружнасці захоўваецца адзінства тых дзевяці дзяржаў, якія ў яго ўваходзяць, – няхай і далікатнае, але яно ёсць. Аднак хацелася б бачыць больш актыўную ролю магутных краін, якія маюць вялікія рэсурсы і магчымасці, як Расія, Казахстан, Азербайджан, якія могуць быць сур’ёзнымі лакаматывамі развіцця ў СНД, лічыць Прэзідэнт Беларусі. Менавіта гэтыя краіны, паводле меркавання Аляксандра Лукашэнкі, павінны ісці наперадзе і весці за сабой іншых удзельнікаў Садружнасці. Яны павінны прапаноўваць канкрэтныя рашэнні ў сферы эканамічнага ўзаемадзеяння і тым самым павялічваць каштоўнасць прысутнасці ў СНД. «Таму патрэбны крокі ў галіне эканомікі. Больш сур’ёзныя», – падкрэсліў беларускі лідэр.
У сувязі з гэтым ён пазітыўна адзначыў заявы, зробленыя на саміце кіраўнікамі Азербайджана і Арменіі аб развіцці лагістычных магчымасцей па перамяшчэнню грузаў.
“Не будзем дзейнічаць – паціху-паціху нас расцягнуць па розных арганізацыях”, – папярэдзіў Аляксандр Лукашэнка.
Па прыклады далёка хадзіць не трэба. Малдова збіраецца афіцыйна аформіць выхад з СНД. Прэзідэнт Беларусі заявіў, што гэта рашэнне не простых грамадзян, а кіраўніцтва краіны, прычым недальнабачнае. І заклікаў кіраўніцтва Малдовы не разрываць поўнасцю каналы ўзаемадзеяння, а захаваць іх для простых людзей хаця б на першапачатковым этапе. “Прасцей кажучы, навошта губляць тое, што маем”, – адзначыў ён.
Прэзідэнт адзначыў, што Беларусь заўсёды паслядоўна выступала за развіццё і спалучэнне пераваг усіх існуючых інтэграцыйных структур. «Фарміраванне шматпалярнага свету адбываецца шмат у чым за кошт набіраючых сілу БРІКС, ШАС, Афрыканскага саюза і іншых аб’яднанняў Глабальнай большасці. Хацелася б, каб у гэтым шэрагу была і СНД», – заўважыў беларускі лідэр. Тым больш што ў СНД ёсць перавага: адзінства Садружнасці абапіраецца на агульную гісторыю, культурную спадчыну, чалавечыя сувязі.
«Няма сумневаў у тым, што патэнцыял СНД не вычарпаны. Наш саюз з’яўляецца – і яшчэ на доўгія гады застанецца – Садружнасцю агульнага лёсу », – упэўнены беларускі лідэр.
Новы віток у развіцці арганізацыі – рашэнне Азербайджана ўпершыню прыняць старшынства ў СНД у 2028 годзе. Кіраўнік беларускай дзяржавы назваў гэта гістарычным момантам .
Як вядома, Азербайджан і Арменія доўгі час устрымліваліся ад старшынства ў СНД з-за шматгадовага тэрытарыяльнага канфлікту, які цяпер завершаны. Цяпер бакі знаходзяцца на стадыі мірнага працэсу ў мэтах канчатковага ўрэгулявання. Аляксандр Лукашэнка выказаў надзею, што ў 2029 годзе ў адпаведнасці з чарговасцю старшынстваваць будзе Арменія. А ў 2027 годзе старшынства пераходзіць да Узбекістана , гэтае рашэнне было зацверджана на саміце.
Акрамя таго, па выніках пасяджэння Савета кіраўнікоў дзяржаў лідары краін СНД прынялі заяву ў сувязі з 35-годдзем Садружнасці . У СНД 2028 год аб’яўлены Годам сацыяльнага развіцця і якасці жыцця , а 2029-ы — Годам транспартнай звязанасці. Зацверджана рашэнне па фарміраванні станоўчага ладу Садружнасці і яго дзяржаў – удзельніц у інфармацыйнай прасторы, а таксама рашэнне па пытанню аб правядзенні перапісаў насельніцтва раунда 2030 года ў СНД.-0-
Купіць білет онлайн