Поўны відэарэпартаж даступны па спасылцы – Вынікі тыдня Прэзідэнта .
Мінулы тыдзень у графіцы Аляксандра Лукашэнкі быў насычаны беларуска-расійскім парадкам дня. У пятніцу і суботу – перамовы ў Маскве з Прэзідэнтам Уладзімірам Пуціным і сустрэча з прэм’ерам-міністрам Міхаілам Мішусціным. А на пачатку тыдня ў Мінску кіраўнік дзяржавы прымаў першага віцэ-прэм’ера расійскага ўрада Дзяніса Мантурава і губернатара Архангельскай вобласці Аляксандра Цыбульскага.
Прэзідэнт таксама ўзнагародзіў Міхаіла Мішусціна і Дзяніса Мантурава ордэнам Дружбы народаў.
Падыходы па мадэрнізацыі сельгасвытворчасці былі разгледжаны на нарадзе ў кіраўніка дзяржавы на прыкладзе Віцебскай вобласці. Частку прадпрыемстваў, якія неэфектыўна працуюць, там перадаюць паспяховым, у тым ліку прыватным кампаніям. Аляксандр Лукашэнка не супраць такога падыходу, але даручыў пры гэтым, безумоўна, улічыць дзяржаўныя інтарэсы.
Прэзідэнт на нарадзе таксама расказаў аб нечаканых выніках накіравання нядбайных сельгасработнікаў у армію.
З 1 верасня працоўныя пенсіі ў Беларусі вырастуць у сярэднім на 5% – адпаведны ўказ падпісаў Прэзідэнт.
Устаноўлены юбілейны медаль да 30-годдзя Усебеларускага народнага сходу. Узнагароджваць будуць дэлегатаў УНС і тых, хто ўнёс значны ўклад у станаўленне і развіццё народаўладдзя ў Беларусі.
Яшчэ адным указам кіраўніка дзяржавы зацверджаны геральдычныя сімвалы Міністэрства жыллёва-камунальнай гаспадаркі.
Прэзідэнт павіншаваў беларускіх шахцёраў з прафесійным святам, адзначыўшы іх бязмежнае самавалоданне, смеласць, вытрымку, сілу волі і высокі прафесіяналізм.
Аляксандр Лукашэнка павіншаваў народную артыстку Беларусі Ніну Ламановіч з днём нараджэння.
Віншаванні народам і лідэрам замежных краін па розных падставах былі накіраваны ва Украіну , Казахстан , Азербайджан , Малдову .
Не абышлося на тыдні і без сумных падзей. Спачуванні Аляксандр Лукашэнка адрасаваў у Кітай , Непал , Алжыр і Нарвегію .
РАСІЙСКІ МАРАФОН. Як прайшоў візіт Лукашэнкі ў Маскву і з кім кіраўнік дзяржавы сустрэўся ў Мінску
Самая важная падзея тыдня – працоўны візіт Прэзідэнта ў Расію, дзе адбыліся сустрэчы спачатку са старшынёй урада Міхаілам Мішусціным, а затым з Прэзідэнтам Расіі Уладзімірам Пуціным.
Можна сказаць, што адны перамовы арганічна дапаўнялі іншыя. Аляксандр Лукашэнка на сустрэчы са сваім калегам у падмаскоўнай рэзідэнцыі Нова-Агарава нават адзначыў, што непасрэдна прэзідэнтам пасля змястоўнага абмеркавання шырокага кола пытанняў з Міхаілам Мішусціным засталося менш працы.
«Для прыняцця рашэнняў практычна пытанняў няма. Урады добра працуюць, – сказаў кіраўнік дзяржавы. – Мы сістэмна і ўсёабдымна прапрацавалі ўвесь пералік. Прытым ініцыятарам быў не я, а Міхась Уладзіміравіч. Ён дастаў свой блакнот і перачытаў, пералічыў усе гэтыя праблемы, пытанні. Мы іх прааналізавалі. Добрая адбылася размова».
У тавараабароце Беларусь і Расія сёлета прыкметна дадаюць нават да рэкорднага ўзроўню мінулага года – як мінімум на 12%. Аляксандр Лукашэнка пры гэтым з задавальненнем адзначыў, што ў гэтым тавараабароце вялікае месца займае сучасная электроніка. Гэты напрамак сумеснай работы, па якім у Беларусі ёсць нядрэнныя кампетэнцыі, абмяркоўваўся не толькі на сустрэчы Прэзідэнта з расійскім прэм’ерам, але і з яго першым намеснікам, які на тыдні прыязджаў у Мінск, – Дзянісам Мантуравым.
Аляксандр Лукашэнка на перамовах з Уладзімірам Пуціным выказаў поўную ўпэўненасць у тым, што краіны здольныя самастойна вырабляць і забяспечваць сябе неабходнай мікраэлектронікай: «Мы тут абсалютна не застанемся голымі і без гэтых тавараў – мікраэлектронікі. Мы сёння абсалютна ўсё ствараем, што трэба разам. Заўтра мы выйдзем на вельмі высокі ўзровень».
“Што датычыцца бягучых пытанняў, мы свята выконваем усе нашы дамоўленасці, пачынаючы ад сельскай гаспадаркі, харчавання, паліва”, – дадаў беларускі лідэр.
Гаворачы аб рэгулярнасці беларуска-расійскіх кантактаў, у тым ліку на вышэйшым узроўні, Аляксандр Лукашэнка растлумачыў гэта не толькі жаданнем лідэраў дзвюх краін: «Дынаміка міжнародных адносін такая, што яна нас у тым ліку падштурхоўвае да таго, каб абмяркоўваць тыя праблемы, якія перад намі стаяць. Што мы разам будзем, супрацоўнічаючы, пераадольваць усякія цяжкасці, вы ў гэтым можаце нават не сумнявацца».
Уладзімір Пуцін у сваю чаргу адзначыў, што галоўны напрамак узаемадзеяння – гандлёва-эканамічны – развіваецца паспяхова, нягледзячы на ўсе спробы звонку неяк паўплываць на гэта. “Што самае важнае, прынцыповае, на мой погляд, што мы ўзаемадзейнічаем і на традыцыйных напрамках, і на напрамках, якія сёння з’яўляюцца асабліва важнымі – гэта высокія тэхналогіі”, – падкрэсліў ён.
Кіраўнік беларускай дзяржавы на сустрэчы ў Белым доме з Міхаілам Мішусціным падзякаваў ураду Расіі за бездакорнае выкананне сваіх абавязацельстваў перад Беларуссю. «Думаю, і вам прад’явіць прэтэнзіі да Беларусі няма ў чым. Павінен яшчэ раз публічна вас запэўніць, што ўсё, што мы намячалі, выконваецца і будзе выканана. Мы выконваем свае абавязацельствы і нават перавыконваем», – падкрэсліў Прэзідэнт.
Самога Міхаіла Мішусціна праз месяц чакаюць у Мінску – у самым пачатку кастрычніка ў беларускай сталіцы пройдуць пасяджэнні Савета Міністраў Саюзнай дзяржавы і Еўразійскага міжурадавага савета. Адначасова Мінск будзе прымаць ІІ Міжнародную прамысловую выставу «ІННАПРОМ. Беларусь» .
Як зазначалася вышэй, развіццё беларуска-расійскага супрацоўніцтва на тыдні абмяркоўвалася не толькі ў Маскве, але і ў Мінску ў Палацы Незалежнасці. «Мы ў адрозненне ад усіх іншых краін (якія, натуральна, сябры Расіі, але не хочуць публічна нешта там агучваць) не адхрышчваемся ні ад адных зручных, нязручных пытанняў. Мы шчыра кажам, што лічым за гонар супрацоўнічаць з Расеяй , і будзем супрацоўнічаць. У гэтым можаце не сумнявацца. Справа не ў тым, што сітуацыя нас да гэтага падштурхоўвае. А справа ў тым, што мы гэты курс вызначылі даўно, некалькі дзясяткаў гадоў таму — і свята яго прытрымліваемся», — заявіў Аляксандр Лукашэнка на сустрэчы з першым намеснікам старшыні ўрада Расіі Дзянісам Мантуравым.
Прэзідэнт падзякаваў першаму віцэ-прэм’еру за падтрымку Беларусі па шэрагу напрамкаў супрацоўніцтва — у аўтамабілебудаванні і асабліва ў самалётабудаванні. Саюзнаму самалёту «Асвей» – быць. «Ён патрэбен на нашым агульным рынку. Натуральна, для Расіі гэта добры будзе самалёт. Ну а для нас – набыццё новых кампетэнцый. Вы бачылі, што мы займаемся рамонтам шматлікіх самалётаў. Нешта ўжо ўмеем рабіць. Не на голым месцы. Таму з дапамогай расіян мы маглі б асвоіць новы напрамак у прамысловасці”, – сказаў Аляксандр Лукашэнка.
Чакаецца, што вопытны ўзор самалёта “Асвей” з’явіцца ў 2027 годзе, а да канца 2029-га будзе завершана яго сертыфікацыя. Пры гэтым беларускія прадпрыемствы авіяпрама ўжо актыўна ўдзельнічаюць у кааперацыі па вытворчасці кампанентаў для расійскіх самалётаў.
Рэалізуючы буйныя галіновыя праекты з Расіяй, у Беларусі не забываюцца і пра ўмацаванне сувязей на ўзроўні рэгіёнаў. Аляксандр Лукашэнка не раз прызнаваўся, што ў свой час менавіта рэгіёны выратавалі беларуска-расійскія адносіны ў цэлым. Таму і дагэтуль губернатары з Расіі – частыя госці ў Мінску.
У пачатку тыдня Аляксандр Лукашэнка ў Палацы Незалежнасці сустрэўся з губернатарам Архангельскай вобласці Аляксандрам Цыбульскім. Ёсць добрыя перспектывы для супрацоўніцтва ў вытворчасці лесанарыхтоўчай тэхнікі, у горназдабыўной прамысловасці, торфараспрацоўках, сферы транспарту і лагістыкі. Традыцыйна ў гэтым паўночным расійскім рэгіёне запатрабаваны беларуская прамысловая прадукцыя, прадукты харчавання. Цяпер таксама ідзе размова аб аднаўленні прамых рэйсаў паміж Мінскам і Архангельскам, у тым ліку з выкарыстаннем найноўшых самалётаў Іл-114-300.
НЕ ПАДАРУНАК, А НАГРУЗКА. У чым асаблівасці антыкрызіснага плана для АПК Віцебскай вобласці
Аляксандр Лукашэнка 27 жніўня сабраў нараду па асобных пытаннях сацыяльна-эканамічнага развіцця.
Адной з галоўных тэм стала мадэрнізацыя сельгасвытворчасці, у тым ліку перадача дзяржаўных актываў у аграпрамысловым комплексе ва ўпраўленне новым уласнікам, у тым ліку прыватныя кампаніі. «Рэзка сказаць – прыватызацыі. Гэта падобна на тое, што мы дзяржаўную ўласнасць перадаем ва ўпраўленне або адразу прадаём прыватным кампаніям», – адзначыў кіраўнік дзяржавы.
Пытанне было разгледжана на прыкладзе Віцебскай вобласці, у адносінах да якой у пачатку года быў вызначаны канкрэтны пакрокавы антыкрызісны план . Па гэтай стратэгіі было прынята рашэнне аб перадачы Аршанскага мясакамбіната агракамбінату “Дзяржынскі” і замацаванні асобных сельгасарганізацый Аршанскага раёна за ААТ “Савушкін прадукт”. З інвестарам у асобе “Савушкіна прадукта” заключаны дагавор арэнды маёмасці ААТ “Полацкі малочны камбінат” для далейшага паскоранага развіцця.
“Трэба разумець, што такія рашэнні не падарунак прыватніку, а хутчэй нагрузка”, – падкрэсліў Прэзідэнт. – Забіраючы перапрацоўку, трэба разумець, што табе намалююць 20-30 сельгаспрадпрыемстваў, якім трэба добра плаціць і адтуль забіраць малако на Полацкі малочны камбінат. Менавіта такая павінна быць палітыка, а не проста: “Забірай і ўсё”.
Гэта значыць, у кожным выпадку зафіксаваны абавязацельствы, у тым ліку па мадэрнізацыі вытворчасці і пагашэнні раней назапашаных абавязацельстваў.
Акрамя мадэрнізацыі сельгасвытворчасці і развіцця сыравіннай базы Аляксандр Лукашэнка агучыў яшчэ адно патрабаванне да кіраўнікоў прыватных кампаній: атрыманыя грошы павінны не ісці за мяжу, а заставацца ў выглядзе далейшых інвестыцый у краіне.
На нарадзе ў Прэзідэнта абмяркоўваўся лёс усёй сельскагаспадарчай вытворчасці Дубровенскага раёна. Было прапанавана перадаць дзесяць арганізацый раёна і прадпрыемства “Віцебскі бекон” групе кампаній “Сервалюкс”. Быў падрыхтаваны праект адпаведнага ўказа.
На першым этапе аблвыканкамам прынята рашэнне аб перадачы паўнамоцтваў кіраўніка даных сельгасарганізацый інвестару. Гэта дало магчымасць аказаць фінансавую падтрымку гаспадаркам для ажыццяўлення ўсяго комплексу сельгасработ у першым паўгоддзі, заклаўшы аснову будучага ўраджаю. Цяпер інвестар выказаў гатоўнасць выкупіць названыя арганізацыі і ўзяць на сябе абавязацельствы па іх далейшаму развіццю. Натуральна, адначасова ставіцца пытанне аб прадастаўленні шэрага льгот і прэферэнцый, рэструктурызацыі праблемнай запазычанасці.
«Не ён жа гэтыя запазычанасці напрацаваў. Але рэструктурызацыі, растэрміноўкі і адтэрміноўкі павінны ўкладвацца ў пяцігадовы тэрмін прэзідэнцтва», – пазначыў умову кіраўнік дзяржавы.
Аляксандр Лукашэнка даручыў яшчэ раз усё грунтоўна пралічыць, каб улічыць дзяржаўныя інтарэсы. З іншага боку, і нагрузка на новых уладальнікаў не павінна быць забойнай. Іншымі словамі, павінен быць выкананы баланс інтарэсаў дзяржавы і фундатара. Бо ў канчатковым рахунку галоўная задача – забяспечыць стабільную працу сельгаспрадпрыемстваў і раёна ў цэлым.
Пры гэтым, падкрэсліў кіраўнік дзяржавы, перадача сельгасактываў прыватнай кампаніі не павінна прывесці да самаўстаранення кіраўнікоў мясцовых органаў улады: «Старшыня Дубровенскага райвыканкама жалезабетонна павінен кантраляваць свае пытанні: парадак, дысцыпліна, правы чалавека. Але і пра абавязкі не забывацца. Галоўнае – кадры. Ніводнага чалавека без вашага ўзгаднення або зацвярджэння не павінны прызначаць. Трэба, каб старшыня аблвыканкама, райвыканкама жалезабетонна разумелі свае правы і абавязкі і каб яны маглі спытаць (за канкрэтны вынік. – Заўвага БЕЛТА)».
Ну а з канкрэтнымі метадамі перавыхавання нядбайных працаўнікоў у Беларусі вызначыліся. Раней Аляксандр Лукашэнка даручаў тых, хто не хоча добрасумленна працаваць на зямлі, накіроўваць на перападрыхтоўку ў войска. І вынікі аказаліся збольшага нечаканымі, аб чым кіраўнік дзяржавы таксама расказаў на нарадзе.
«Некаторыя так – «хі-хі, ха-ха» – успрынялі, калі я сказаў на селектарнай нарадзе: нядбайных, алкашоў і іншых, якія не жадаюць працаваць на зямлі ва ўборку, – на «фронт». У войска, у сілы спецыяльных аперацый, на мяжу», – адзначыў Прэзідэнт.
У выніку на дадзены момант з дапамогай мясцовых уладаў знайшлі і прызвалі ў вайсковыя рады каля 500 чалавек, хоць Аляксандр Лукашэнка першапачаткова меркаваў, што гэтая лічба можа быць значна большай. Прэзідэнт ужо не аднойчы цікавіўся ў міністра абароны Віктара Хрэніна, як гэтае папаўненне з ліку нядбайных работнікаў спраўляецца з вайсковай службай. І некалькі разоў прасіў пераправерыць інфармацыю, калі яму дакладвалі, што ў войску да гэтых людзей няма пытанняў. Наадварот, міністр мае жаданне заахвоціць асобных з іх.
«Твары светлыя, працуюць, выконваюць усё, што афіцэр скажа. Ну ніякіх прэтэнзій. Яны зямлянкі выкапалі лепш, чым у Менску кватэры абсталявалі. Вось табе і п’яніцы, такія-сякія, – распавёў беларускі лідэр. – А кажуць, што войска – гэта не лагер для выхавання. Так, гэта не лагер. Але школа выхавання вельмі добрая. Нармальныя мужыкі. Прайшлі перападрыхтоўку».
У сувязі з гэтым, заўважыў Аляксандр Лукашэнка, узнікае пытанне, чаму іх не змаглі належным чынам арганізаваць на асноўным месцы працы. Значыць, гэтыя людзі могуць працаваць, але проста патрэбен адпаведны падыход. Ставіцца да людзей трэба па-чалавечы, але і жалезабетонна патрабаваць, арыентуе кіраўнік дзяржавы.
Як далажыў на нарадзе старшыня Віцебскага аблвыканкама Аляксандр Рагожнік, у сельскагаспадарчай галіне рэгіёна адзначаюцца пазітыўныя змены. Практычна завершана будаўніцтва цялятнікаў: гатова 68 з 72. На фоне станоўчых вынікаў прынята рашэнне павялічыць іх колькасць у вобласці да 96. Акрамя таго, у Віцебскай вобласці ўжо нарыхтавалі кармы і завяршылі сяўбу азімага рапсу.
“Вынік можа быць дасягальны” , – зрабіў выснову Аляксандр Рагожнік аб перспектывах развіцця рэгіёну.
Пазітыўная ацэнка на гэты конт прагучала і ад кіраўніка дзяржавы: «Віцебская вобласць да сярэдзіны жніўня пасеяла ўвесь рапс – такога ніколі не было! Паглядзім яшчэ на вынік».
Купіць білет онлайн