4 ліпеня, Астана /Кар. БЕЛТА/. Дзень уступлення Беларусі ў Шанхайскую арганізацыю супрацоўніцтва ўвойдзе ў гісторыю краіны. Аб гэтым кіраўнік беларускай дзяржавы Аляксандр Лукашэнка заявіў на пасяджэнні Савета кіраўнікоў дзяржаў – членаў ШАС у Астане, перадае карэспандэнт БЕЛТА.
Прэзідэнт выказаў словы падзякі ў адрас гаспадароў саміту — казахстанскага боку — за цудоўную арганізацыю сустрэчы і сардэчны прыём у Астане. “Дзякуючы ў тым ліку і вашаму паспяховаму старшынству гэты дзень увойдзе ў гісторыю Беларусі як дата далучэння нашай краіны да Шанхайскай арганізацыі супрацоўніцтва”, – сказаў беларускі лідэр.
Аляксандр Лукашэнка назваў паказальным і сімвалічным яшчэ і той факт, што год прыняцця ў ШАС супаў з 80-годдзем вызвалення Беларусі ад нямецка-фашысцкіх захопнікаў. “Гэта цудоўны падарунак беларускаму народу”, – заявіў кіраўнік дзяржавы.
Прэзідэнт таксама падзякаваў астатнім калегам – кіраўнікам дзяржаў ШАС – за аднадушную падтрымку гэтага рашэння.
Кіраўнік дзяржавы расказаў аб канкрэтных напрамках, якім Беларусь у якасці паўнапраўнага ўдзельніка плануе ўдзяліць павышаную ўвагу. Ён запэўніў, што краіна гатова працаваць поплеч з новым старшынствам (пасля Казахстана старшынства ў ШАС пяройдзе Кітаю) па рэалізацыі сумесных прыярытэтаў.
Аб міжнароднай бяспецы
«Глыбока перакананыя, што ў XXI стагоддзі неабходна выбудоўваць сапраўдную і непадзельную глабальную бяспеку. Пры гэтым ініцыятыву павінны ўзяць на сябе краіны Глабальнага большасці, паколькі самаўлюбёны, эгаістычны Захад на такое аказаўся не здольны. Там сёння няма лідэраў, здольных прымаць адказныя рашэнні самастойна», – заявіў Аляксандр Лукашэнка.
Са свайго боку, запэўніў ён, Беларусь пастараецца адаптаваць свае ініцыятывы ў гэтай найбольш актуальнай сёння для партнёраў сферы.
Аб эканоміцы
Кіраўнік дзяржавы канстатаваў, што ўжо зараз у партнёраў па ШАС ёсць узаемавыгадныя праекты ў энергетыцы, транспарце і лагістыцы, фінансах і прамысловай кааперацыі. “Калі мы выпрацуем на нашай пляцоўцы дакладныя правілы, выйграюць усе, у тым ліку за межамі рэгіёну адказнасці ШАС”, – упэўнены беларускі лідэр.
Аб харчовай бяспецы
Гаворачы аб харчовай бяспецы, Аляксандр Лукашэнка заўважыў, што выклікі ў гэтай галіне зыходзяць не толькі ад традыцыйных фактараў, такіх як змяненне клімату і прыродныя катаклізмы, але і штучных бар’ераў, у тым ліку незаконных санкцый адносна мінеральных угнаенняў, тэхнікі, сродкаў аховы раслін, маршрутаў паставак. Як вынік, людзі ў краінах, якія развіваюцца, уключаючы найбяднейшыя дзяржавы Азіі, Афрыкі і Лацінскай Амерыкі, вымушаны галадаць.
“У нашых сілах разбурыць сцены аднапалярнага свету, накарміць людзей, устараніўшы шмат супярэчнасцей і канфліктаў з-за сацыяльнай няроўнасці, дэфіцыту харчавання і рэсурсаў”, – падкрэсліў кіраўнік дзяржавы.
Аб міжнародным пазіцыянаванні
“Мы пастараемся прыкласці ўсе намаганні, каб рос аўтарытэт нашай арганізацыі, шырылася кола яе саюзнікаў і прыхільнікаў”, – запэўніў Аляксандр Лукашэнка.
Ён адзначыў, што многія беларускія ідэі, выказаныя раней, ужо атрымалі міжнародную падтрымку. Гэта датычыцца трансферу тэхналогій, інфармацыйнай бяспекі, транспарту і лагістыкі, прамысловасці, гандлю і інвестыцый.
“Цяпер ужо ў новай якасці мы будзем імкнуцца максімальна ўвязаць нашы прапановы з ініцыятывамі нашай арганізацыі”, – сказаў Прэзідэнт.
Аб узаемным узбагачэнні культур
«Беларусь пачынае працу ў Шанхайскай арганізацыі супрацоўніцтва з разуменнем, што ШАС – гэта не толькі бяспека, эканоміка і гандаль. Гэта і ўзаемнае ўзбагачэнне культур, што прывядзе да абавязковага збліжэння нашых народаў», – адзначыў кіраўнік дзяржавы.-0-
Купіць білет онлайн